喺呢一篇曾經提過，到埗後要隔離10日，但過咗第5日 full-day 後，就可以做一個叫 “Test to Release” 嘅自我測試，只要係顯示陰性，咁隔離就可以提早結束。聽落係咪幾吸引？我開頭都係咁諗，結果上機前就預早book定做咗 (因為要喺上機前要填定嘅 Passenger Locator Form 入面申報埋)，但試過後，我都建議大家唔好做。
先講吓個流程，喺 GOV.UK 嘅網站度，係有一張好長嘅list，列晒全國有邊間lab有提供呢個服務，因為每一間都收費唔同，我當時就撳咗頭10幾20間入去睇嚟揀，我揀嘅方法第一係要平，因為最平都要90幾鎊，最貴130鎊都有，第二就係個網站要唔好太差，因為太差我對間公司都冇乜信心。咁我揀咗一間係90幾鎊嘅，我香港上機前就book定，佢會喺24小時內經 Royal Mail 寄個 Self test kit 包畀你，你第五日自己做完，就可以用佢嘅包裝同郵遞貼紙，擺入你附近嘅 Royal Mail Priority Mail Box 入面，就會幫你寄番去間 Lab 度做測試。
我到埗當日去到暫住嘅 Apartment 度，Royal Mail 就啱啱送緊嚟，真係好有效率喎！我就好好保管到第五日，一早拎出嚟做測試。測試都係香港果隻鼻咽拭子咁，用棉花棒撩完喉嚨再撩鼻，之後就可以封口拎去寄。
咦你明明係隔離緊㗎喎！係㗎，佢寫到明你係可以拎出去附近嘅 Priority Mailbox 寄，或者你親身去間 Lab 嘅地址度直接交都得，但就唔建議你搭公共交通工具。我相信，大部分人都唔會揀自己去交，除非你真係咁啱住喺你揀果間 lab 附近，所以我都係揀去郵筒度寄。
寄完之後，就係返屋企等消息啦。間 lab 聲稱，會喺收到後24小時內將結果電郵畀我。但一等，就等咗差不多兩日，我先醒起我可以上 Royal Mail 網站個 Track and Trace 度輸入番寄出張標籤嘅號碼去查，一查先知道，原來個郵包去咗距離郵筒10幾 miles 嘅郵局度成日冇郁過！又話係 Priority 嘅？我第二朝一早，就打電話去 Royal Mail 個客戶服務電話度問啦 (電話只係等咗唔夠10分鐘就有人接，算快啦！)，結果佢只係不斷道歉，話個郵包最早應該第二日就會送去，最遲呢，就要等多一星期。如果真係一星期，咁都過晒10日隔離，我仲做嚟做咩呢？佢就只係話可以搵番間 lab 傾賠償問題。
好，咁我又問吓間lab，佢哋嘅回覆係，呢個係 Royal Mail 嘅問題，要賠都係佢哋賠。兩間係咪夾定㗎？不過，到第二日再上 Royal Mail 度check，個郵包終於都喺凌晨4點時送到，而當日嘅傍晚時份，我都收到間 lab 電郵畀我嘅陰性報告……當時已經係隔離嘅第9日。
我寫呢篇嘅時候，10日嘅隔離令已結束，所以除非你係會直接交個測試樣本畀間 lab，如果唔係經 Royal Mail 一來一回下，其實真係唔會早好多。因為個 Test to release 都唔係平，所以我今次經驗嚟講，我係唔建議大家做嘅！
P.S. 10日隔離過去，我同太太最後都冇收過任何電話check我哋係咪隔離緊，好靠大家自律呀！
#武漢肺炎 #隔離 #RoyalMail
__________________________________
Facebook: fb.com/englanddaddy
MeWe: mewe.com/i/englanddaddy
Buy me a beer 🍺 : buymeacoffee.com/englanddaddy
