英國嘅武漢肺炎疫情，因為12月尾出現變種，1月初去到每日6萬宗確診，結果要實施全國封城措施，1月8號宣布，所有入境人士都要有離境前72小時進行嘅測試，要拎住陰性證明先可以入境。由1月18號開始，本來屬於「旅遊通道」(Travel Corridor) 本身免隔離嘅國家或地區都要暫停直至最少2月15號，換言之，所有入境者都要接受10日隔離。
先講陰性測試。GOV.UK網站寫明PCR Test (中文應該就係成日聽到嘅核酸檢測) 就可以，香港去私家醫院做的話，應該即日內有結果，但係費用都比較貴，我哋就只係去咗政府旗下嘅社區檢測中心去做，可以先提前預約，每位費用係240蚊。(不過就係華大基因…) 申請時，記住要寫明係出國用，因為要填護照號碼，咁份報告上面先至會有護照號碼核對用，用特區護照填都冇問題。要注意一點，英國政府網站寫明，11歲以下係可以豁免出示呢個陰性證明。做完之後，第二日就會有SMS通知結果，你都可以喺收到結果後，再親身去中心度拎番份報告嘅列印本。
我哋喺香港機場辦理check-in時，地勤就已經要我哋出示報告，因為我哋戚德國轉機去英國，喺轉機櫃檯度，職員都有要求我哋出示證明。不過，去到英國過關時，Border Office關員唔知係咪要忙於幫我哋辦理LOTR手續，全程都冇向我哋要求出示陰性證明！
//自律、自律、自律//
除咗陰性報告之外，所有入境旅客都要喺到達英國前48小時填妥Passenger Locator Form，內容包括你幾時由邊度出發，預計幾時到達英國，嚟到之後頭10日會逗留噝邊度，同埋可以用電話或SMS聯絡到嘅電話號碼 (香港或英國都可以)。填完之後，你會收到電郵同份Form嘅 PDF版。不過，Border Office關員同樣冇叫我哋出示。
喺機場落機時，去廁所見到3個並排尿兜封咗中間果個，原來貼咗張Social Distancing嘅貼紙；出到去排隊過關，雖然地下每隔1.5米貼咗企位指示貼紙，但唔少旅客都冇遵守，機場職員亦冇嚴格執行，就連過關Border Force關員，都竟然唔戴口罩！只係靠一塊透明膠板阻隔住，唯有自律做好自己。
關於隔離。呢10日自我隔離，係唔會好似香港咁，有一啲指定嘅檢疫酒店畀你去訂 (除非你本身係國民，同埋由南非、巴西或葡萄牙呢啲本身禁入境嘅地方過嚟)，如果未買/租到地方，記住訂酒店或BNB時一次訂過10日。同樣地，Border Office關員連呢樣都冇特別講明，真係好靠自己做功課同自律。雖然新聞話英國警方會加強特擊巡查，睇吓入境者係咪有遵守自我隔離，但到第四日都冇收過電話，只係收過一個溫馨提示嘅SMS。我諗起舊年3月，首相約翰遜畀人話佢係「佛系抗疫」，其實去到差不多一年後嘅今日，有好多嘢都的確有改善嘅地方。
喺呢10日入面，建議你可以喺機場入面買多啲嘢，甚至提早搵定各大超市嘅網站揀定貨同送貨timeslot，因為真係一slot難求。不過，政府其實提供咗一個叫 “Test to Release” 嘅自費檢測服務，佢有一個實驗室名單，你可以訂定到埗後第5日 full day 去做呢個測試，只要出咗陰性結果，自我隔離就可以提早結束 (記住要喺 Passenger Locator Form度申報)，費用由99鎊-120鎊不等。我就book咗做呢個測試，之後再同大家分享過程係點做。
#英國 #LOTR #倫敦 #希斯路 #武漢肺炎檢測 #英倫爸爸
_______________________
Facebook: fb.com/englanddaddy
MeWe: mewe.com/i/englanddaddy
Medium: englanddaddy.medium.com
Buy me a beer: buymeacoffee.com/englanddaddy
