【Sir Alex Ferguson: Never Give In】

十幾年前喺英國睇過一次戲，係喺曼徹斯特嘅奧脫福球場附近嘅 Red Cinema (已執)；今晚係第二次。今日《Sir Alex Ferguson: Never Give In》呢套紀錄片上畫，去咗 Harrow 呢間 Vue 戲院睇。

Vue 集團喺英國同愛爾蘭都有 90 間戲院，今次去呢間都有分拆 6 間細院，其中一間係上緊日本史上最高票房果套《鬼滅之刃：無限列車篇》。戲飛都要 12 鎊一張，對比香港叫貴少少，不過呢度啲座位好舒服，小食部仲有啤酒賣！

下面係講套戲，冇興趣可以 skip，有興趣但唔想「劇透」都可以 skip。

– — – — – — – — – — –

以曼聯領隊費格遜為主題嘅 documentary，呢套唔係第一套，而家 Netflix 仲可以睇到嘅《Secrets of Success》 就係其中之一，而且出現嘅球星更多。同之前一樣，呢套都係以費 sir 訪談為主幹，但因為導演係費 sir 個仔 Jason，加上籌備期間發生佢腦出血嘅意外，所以會有較多家庭成員參與，好似太太Cathy同兄弟Martin等，同埋費 sir 分享好多成長回憶嘅內容，係同之前純足

球documentary 嘅最大分別，

影片頭 45 分鐘，都係費 sir 講自己成長同球員生涯，仲有執教鴨巴甸；去到中段開始先講到曼聯，而今次參與影片嘅球星，就只係得史特根、傑斯同簡東拿。

費 Sir 咁神，其一係佢極其出色嘅 man management，佢會盡佢能力場外場內都會各方面幫球員，或者主動畀建議佢哋，因為佢嘅角色就係球員們嘅 manager。好似簡東拿喺影片入面就話，佢個人係好需要自由，而費格遜畀咗佢絕對自由去發揮，令佢會用盡全力報答佢。

另一方面，當然仲有佢喺大賽每每作出嘅果斷決定。影片入面就有兩個例子：第一，1990 年足總盃決賽。當年嘅正選門將，係同費 sir 喺鴨巴甸時合作無間，到佢過檔曼聯時都要一手將佢簽過嚟嘅禮頓 (Jim Leighton)。但係禮頓果場表現唔好，結果兩隊打成 3–3 (當年係要擇日重賽)，結果費 sir 就決定重賽唔出佢，改出施利 (Les Sealey)，原因只因為佢要揀可以幫佢贏波嘅球員。結果施利不負所託，幾次精彩撲救，幫曼聯重賽 1–0 贏波捧盃。呢一場之後，被打入冷宮嘅禮頓耿耿於懷，冠軍獎盃都拒絕領收之餘，自此再冇同費格遜講嘢，而佢喺球隊亦淪為第四門將，離隊前都只係出賽過一場，但當年球隊經歷多年低潮，最終拎到冠軍亦已勝過一切。

第二個例子，就係 1999 年對拜仁慕尼黑果場歐聯決賽。呢一場係影片嘅重頭戲，佔咗差不多 10 分鐘，因為呢一場正正反映影片主題 Never Give In。果季「黑雙煞」高爾 (Andy Cole) 同約基 (Dwight Yorke) 幫球隊射入超過 40 球，但表現唔好就要變要換。成場決賽就只換個兩個人，就係下半場66 分鐘換入舒靈咸 (Teddy Sheringham)，同 80 分鐘換入蘇斯克查 (Ole Gunnar Solskjaer)，結果就係憑呢兩個後備球員，喺補時階段幫球隊建功反勝捧盃，完成三冠王神話。費 sir 冇因為某個球員係球隊主將而唔將佢抽起，佢只係會做幫佢贏得果場比賽嘅決定。早排睇訪問話佢好後悔一場對巴塞隆拿嘅決賽冇用朴智星 (Park Ji-Sung) 全場緊盯美斯 (Leo Messi)，決賽一場定生死，一個決定足以決定整場比賽命運，呢樣嘢今時今日嘅曼聯球迷應該好明白。

影片最終以 2018 年 9 月 (腦出血意外4 個月後)佢重返奧脫福作結，場面係好令人感動。佢 Never Give In 嘅態度，都係佢可以迅速康復嘅好大原因。其實，影片仲有好多可以講，好似1999年後嘅曼聯、曾經諗住退休又打消念頭、點樣喺進入新世紀後再打造另一支黃金球隊等等都完全冇提及，只可以講，要講佢嘅嘢實在有太多可以講喇。

#曼聯 #費格遜 #NeverGiveIn

___

Facebook: fb.com/englanddaddy

Instagram: Instagram.com/englanddaddy

YouTube: https://youtube.com/channel/UCbu2FeFXZ1RAuhioQDF-npQ

Medium: englanddaddy.medium.com

MeWe: mewe.com/i/englanddaddy