// 搵一般或兼職工係咪易啲//
之前提過太太一擊即中畀我早返工，今次就分享吓佢嘅case。利申只係佢個人經驗，純粹當個參考。
十幾年來，太太主要打一份工，都屬於CS界別嘅，嚟到其實原本係想搵同區嘅兼職工作，所以就 apply 市中心附近舖頭，搵入面類似CS 嘅工作，好似超市、麵包舖、書店、鞋舖等等。
呢啲舖頭好多都係大集團分店，申請嘅時候通常都會指你去間公司自己嘅網站，或者係外判其他處理工作申請嘅網站。每個網站都要開設個新戶口，搵五份隨時要開五個新戶口，開完之後先有得填form。
就算只係申請一份看似簡單嘅 Customer Assistant 工作，都要花你成個鐘去填表。點解？因為除咗填基本資料之外，仲要答好多問題！問題有長有短，長嘅可能要你寫100字去講點解覺得自己適合呢份工作；短嘅會有好多處境性嘅問題，例如係一啲日常同顧客會遇到嘅情況，畀五個答案你揀一個睇你點回應。
大公司請人都會收到好多申請，上年封城時好多人失業，睇過一篇新聞，講話有間餐廳請侍應都收到過千個申請，當中仲要有啲本身做開經理。今年情況應該好番好多，但大公司喺「初選」度set問題篩選都無可厚非。
雖然佢有 CS 經驗答問題又正路，但就算申請呢啲兼職位連下一步都冇，都有聽過朋友亦有類似失敗經驗。最大問題係，想知番feedback 都冇門路，究竟係答嘢揀得唔中，揀嘅工作時段太多人揀，定係冇英國工作經驗呢？
然後，佢就喺Facebook Jobs 見到一個喺倫敦市中心搞嘅酒店集團招募日宣傳。我就鼓勵佢去試。入面嘅玩法係，唔同酒店各據唔同area，有興趣就排某間酒店嘅隊，負責人會問你想做邊一區，好似倫敦就會分東南西北，然後就問你有興趣邊個職位。佢形容成個過程都唔算formal，留晒聯絡後，好快兩三日內就約佢去同經理見面，然後再約多次上去親身睇吓工作環境感受吓，大約一個星期後佢就成為酒店一員了。
因為早前封城關係，原來啲酒店呢段時間都cut晒員工甚至關門，去到5月解封第三步曲後先逐漸開番。可能因為咁，所以酒店集團就搞活動去請人，搞得招聘活動，入面都會有一定數量嘅職位，加上即時見到相關 HR / Line manager，成功機會應該比較大，不妨留意吓呢類型嘅活動。
見工有時都係interview時夾人緣，佢老闆有同佢講，有其他有酒店工作經驗嘅最後都冇請到。佢話當日參加招聘活動嘅人，有啲都唔係好熱心搵工咁，所以真人見面表現出熱誠，可能係會額外加分。
英國本土唔多人做CS，以往好多係來自歐洲其他國家，尤其係東歐。啲公司嘅CS Hotline 都外判出去畀東歐果邊做，不過脫歐之後，都會流失一批人，所以如果有朋友想搵CS工都可以試吓！
___
Blog 目錄索引：https://bit.ly/34VJxEW
Facebook: fb.com/englanddaddy
Instagram: Instagram.com/englanddaddy
YouTube: https://youtube.com/channel/UCbu2FeFXZ1RAuhioQDF-npQ
Medium: englanddaddy.medium.com
MeWe: mewe.com/i/englanddaddy
