星期一，嚟到英國接近半年後第一日正式返工。
第一日接觸呢一行，一朝早就參與咗個半鐘嘅Weekly Meeting，聽咗好多唔知係咩嘅term。不過嚟到新地方，總要有個心去學習嘗試新事物，幾時都係心態最重要。
返工，有人話係移民落地生根嘅重要一步，應該會加快融入外國生活。有工作有收入以外，亦都有平衡心理嘅作用……
嚟到幾個月後，當小朋友番晒學過埋個復活假，配合番英國逐步解封，就業市場慢慢復甦，就開始真正send CV 搵工。我喺香港做 Digital Project Management + Digital Marketing，Agency 同 In-house 都有做過，嚟到都想試吓搵番類似嘅工作。
有人會話，冇英國工作經驗，加上疫情影響未必咁易搵工，嚟到應該咩都做吓先，但係我又唔想咁快做啲完全同之前工作冇關嘅嘢，所以冇send信去申請其他類型嘅工作。
呢篇利申番只係我個人經驗，唔代表適用於其他人或其他工種，純粹當個參考啦。
// 邊度搵工？ //
由第一封信開始直到而家返呢一份大大話話都有兩三個月時間，我唔算apply得好多，大約二三十份左右。我呢一行，通常都係去 Indeed，LinkedIn 或者 reeds.co.uk 度搵，不過得閒撳吓 Facebook 入面嘅 Jobs，間唔中都有啲好嘢，好似 in 過一份四大會計行請 Digital Team 人都係 FB 見到。
另外，將份 CV 擺多啲唔同地方，好似 CV Library 咁都會有幫助，會有啲 Recruitment Agency 主動搵你介紹工作。
如果你係 IT/Tech人，可以去下面呢個谷睇吓，如果你係 Developer，我見到都幾多工作機會，而且幾好 pay。
https://www.facebook.com/groups/932129573918475
// 點填 CV？//
執好份 CV 都重要，盡量一兩版搞掂，最開頭寫段 summary 介紹自己，重點係唔係寫每一份工做過乜 (What)，而係做嘅嘢點樣幫到公司或客戶 (How)。
關於 Expected Salary，呢度係興以年薪計。因為我冇英國工作經驗，所以申請時都有調低少少薪金要求，但有公司嘅 HR 就反而同我講話唔好叫得太低，本身佢拎咗呢個數出嚟畀呢個位，你寫得低可能公司會覺得你叫咁低係咪其實未達水平。有喺倫敦工作多年嘅朋友同我講，不明文規定係，份工喺倫敦市中心嘅話可以叫高幾千鎊 (年薪)，佢話就算同一個 role，分公司喺倫敦市中心同以外地區請人嘅 budget 都唔同。
除咗 CV 外，呢度搵工好多時都會叫你上載埋 Cover Letter (唔係必填但都建議加埋)，網上都會搵到啲 template，個佈局都係介紹自己 ＋ 點解覺得自己經驗加性格等會遘適合份工。
// 點樣 interview？//
Send 完之後，有一半都係冇回音嘅，石沉大海，有一部分就會覆番你 “Unfortunately…” 即係今次唔考慮你之類啦，如果有回音有下一步，大部分一星期左右都會聯絡你。
好多公司都都仲係 WFH，所以 9 成 interview 都係電話或者視像。有啲會由 HR 打嚟作電話面試，覺得有紋有路先會畀資料相關部門去安排第二次面試。
視像面試一般都係用 Zoom，Google Meet 或者較少用嘅 Microsoft Teams，到時下載定。通常一開波都會叫你介紹吓自己，面試呢啲都要儲經驗，我嘅英文叫做一般夠用，就算寫定稿先，頭兩三次都總會緊張總會講得唔順，但幾次之後你自然會知道點改你份稿，逐漸就入腦用番自然講出嚟。
綜合五六次面試經驗，可以特別留意以下呢幾條：
分享吓你最自豪/成功嘅project？ (最好有實質數據支持…)
你嘅領導方式係乜嘢？
情境題，例如你同 teammate 有唔同意見，或者佢哋士氣低落，你會點做？
你嘅Career goal 係乜嘢？
點解會想番 Agency 做？(做過 Agency 再做 in-house，搵番 Agency 工就有問呢條)
其實搵工都好睇天時地利人和同埋人夾人，太太先厲害，佢 interview 係一擊即中，已經返咗成個月工了。最後我番呢份工，運用到我之前嘅經驗，又可以認識呢門未接觸過嘅行業，以第一份工嚟講都好唔錯喇。
P.S. 英國工作節奏唔係想像中咁慢，係咪同近倫敦地區有關就唔知喇
P.S. 2 呢度大部分都係準時返工準時放工，但 lunch 好短，我同太太各自得 45 同 30 分鐘，我啲同事好多都係買份三文治或者沙律喺個位度食就算
___
Blog 目錄索引：https://bit.ly/34VJxEW
Facebook: fb.com/englanddaddy
Instagram: Instagram.com/englanddaddy
YouTube: https://youtube.com/channel/UCbu2FeFXZ1RAuhioQDF-npQ
Medium: englanddaddy.medium.com
MeWe: mewe.com/i/englanddaddy
