呢排寫少咗，因為經過幾個月後，超過50箱船運家當終於運到喇。
2月尾收貨
3月初上船
3月尾經歷蘇彝士運河堵塞事件
4月尾到達荷蘭鹿特丹
5月中到英國
清關+安排送貨等多1個月終於到
呢一篇唔係想介紹船運公司，除咗耐咗少少，負責跟進嘅同事服務唔錯，成個過程都算流暢嘅。不過，幾個月下來，其實喺冇呢50幾箱嘢生活嘅日子都算過得唔錯，即係某程度上已經習慣咗冇呢啲嘢。有個少少嘅個人意見，就係只有呢度買唔到嘅嘢先送嚟 (例如中文書)，或者你有好多呢度賣得好貴嘅嘢 (例如文具)，否則只係寄值得紀念嘅嘢同買唔番嘅嘢。
英國好多嘢都有，寄都要錢，船運仲愈來愈貴，所以運家當真係要好好考慮寄乜嘢。至於價錢，係可以格多幾間，我50箱嘢冇大件傢俬都要3萬，聽朋友講過去幾個月啲價錢係以萬咁上，如果最後斷捨離到唔多嘢，都可以考慮用香港郵政寄唔使船運。
// 流程 //
分享吓今次寄嘢嘅流程啦。搵呢間公司時，先報一報落腳點係邊度，預啲貨幾時上船，同埋要幾多個紙箱。我唔肯定係咪大部分船公司都係咁嘅玩法，大家可以當係一個參考。
呢間公司同我講，英國有7個存貨點，倫敦(分東南西北)、伯明瀚、曼徹斯特同蘇格蘭格拉斯哥，價錢係愈北愈貴，即係運嘢去蘇格蘭係會貴過去倫敦。紙箱分三種大細，佢會建議你咩箱放咩嘢，例如大就放衣物，細就放書本，中就可以放一般物件。但如果有特別大件嘅嘢，例如鋼琴單車等，就要預先講明特別安排。一般幾日都可以送到紙箱同包裝物資上嚟，預鬆啲拎多少少，冇用到嘅箱公司會收番唔會計錢，如果最後真係唔夠，叫佢再送佢會收費，但如果自己去倉拎，可能就會免費，因為我試過。
拎晒啲箱後，就係痛苦嘅打包入箱工作喇。聽過有公司係會幫你pack箱，而我用呢間就係自己pack，但佢會檢查同幫你封箱。兩樣嘅分別係，公司幫你 pack 應該會鬆手啲，我哋自己 pack 就會 pack 爆晒先，真係會搬死人！
點都好，最重要記住記住自己寫低每一個箱入面放咗乜，因為紙箱外位置唔夠寫，而幾個月後，通常你都已經忘記自己擺過咩嘢入啲箱度。嚟到你未必會拆晒所有箱，到時就要按番你嘅需要喺條 list 度揀番。
// TOR //
入晒箱交晒貨，就可以申請免稅。英國有入口稅，但嚟到英國嘅第一年，係可以免稅將個人物品運到英國，記住交好貨就快手填 Transfer of Residence 申請。你要交一份物品清單 (List of Goods)，你大路咁寫就得，好似 Children clothes, adult shoes, kitchen utensils 之類。成功申請後，HMRC 就會將TOR No email 畀申請人，你就可以將資料交畀船運公司。記住呢樣要喺船到達英國前完成！
點申請Transfer of Residence 可以參考下面網站：
https://www.gov.uk/.../application-for-transfer-of...
呀，漏咗一樣，開頭問價時記住問啲貨嚟到英國送apartment使唔使加錢(尤其係冇lift果啲)，如果 House 的話，搬去樓上嘅房間有冇額外收費等等。如果收齊貨就上船，落船就安排送貨，有delay 係間公司嘅問題，一般唔會收你存倉費；除非你要求唔上船住，或者船到英國唔送去住址住，咁就要額外畀錢。
好啦，我要繼續更痛苦咁拆禮物執嘢喇
_____
Blog 目錄索引：https://bit.ly/34VJxEW
Facebook: fb.com/englanddaddy
Instagram: Instagram.com/englanddaddy
YouTube: https://youtube.com/channel/UCbu2FeFXZ1RAuhioQDF-npQ
Medium: englanddaddy.medium.com
MeWe: mewe.com/i/englanddaddy
