趁住學校 term break 假期，就北上去約克 (York) 呢個歷史古城玩咗兩日一夜。約克係倫敦以外最多遊客去嘅英國城市，雖然而家都冇乜其他國家嘅遊客，但係閒日去都已經人頭湧湧！
呢度從羅馬帝國開始就係英格蘭北面重鎮，後來到維京人入侵英國都佔領過約克，所以呢度都可以感受到呢兩種味道。
肉鋪街
約克大教堂
由倫敦 King’s Cross 站搭火車去約克，大約兩個鐘車程。我哋呢兩日主要都係喺約克市中心度逛，即係呢度城牆嘅圍住嘅範圍。呢度有條街係旅遊景點，就係好似《哈利波特》入面斜角巷嘅肉鋪街 (The Shambles) [據維基入面講，作者JK羅琳否認同呢度有關，我覺得應該係電影製作果班拎咗嚟做靈感]。呢度以前係屠宰肉類嘅地方，但今日已經變成有好多特色小店嘅商店街。如果你揸車嚟，可以考慮吓泊車喺 The Shambles Q-Park 呢個室內停車場，再步行去附近嘅肉鋪街同 York Market 度行，泊車費大約 3 鎊一個鐘。
除咗肉鋪街之外，呢度另一景點約克大教堂 (York Minister) 都係歐洲最大教堂之一，不過今次就冇入去。至於食嘢方面，可以歎個 Yorkshire Pudding 配杯地道 Yorkshire Tea，而要食個 Afternoon Tea 可以 book 定 Betty’s，不過真係好爆吓。要食港式味道，我哋今次都試咗唔少人都介紹過嘅上水站 Upper River Restaurant，老闆 2003 年左右就嚟到呢度開外賣店起家，入面有好多款式嘅嘢食揀，我之後再post番餐牌畀大家參考。
我哋夜晚就訂咗一間由馬車房改建嘅 BNB，有超過 200 年歷史，BNB 主人仲好好人帶我哋去睇個 Secret place，下一篇再講～
#約克 #York #英國遊 #肉鋪街 #TheShambles #上水站 #UpperRiverRestaurant #香港人在英國 #英倫爸爸
