【#40 第一針】

今日終於同太太一齊去咗打第一針疫苗。就算當時 BNO Visa 未批，都已經收到 GP 嘅 SMS 提醒去預約打針，NHS 都有寄過信嚟，但因為係打阿斯利康 (AstraZeneca)，有關血栓問題嘅報導令我哋一直都冇應機。睇 Nextdoor 啲人講，呢度一直都冇得揀打邊隻，不過，最近 GP 嘅溫馨提示 SMS 話，除咗阿斯利康仲有輝瑞 (Pfizer-BioNTech，即係香港嘅復必泰) 揀，咁我哋就試吓預約。

// 有得揀針？//

英國打疫苗係免費打，其實好難講邊隻先係好，唔同疫苗對印度變種同智利變種嘅效用都可能唔同，不過由於兩種疫苗處理方法都唔同，唔係你約邊日就可以隨時揀打邊隻，原本冇諗過兩個一齊同一日打，但 GP 話第一劑輝瑞呢排只係得今日有，所以就照 book。

可能喺屋企都會睇香港新聞，大女係好反對我哋打針。佢話你哋兩個死咗咁點算呀？🤣碧咸都紋過「生死有命，富貴由天」，我同啲舊同事講今日去打疫苗，佢就問我有冇面癱？呢啲真係夠晒朋友。

相比起之前打阿斯利康長者排晒長龍，今日去打輝瑞人唔算多，而且相比係較年輕。因為關於阿斯利康嘅副作用同血栓個案，英國都建議嚟緊 40 歲以下可以打另一隻。

// 有冇不良反應？ //

打針前，負責果位護士問我幾個問題，好似有冇食薄血藥？之前對疫苗有冇過敏反應？打果吓一秒就打完，其實冇乜感覺，打完需要坐 15 分鐘確保冇不良反應先准離開。太太話，佢打完之後個頭好似「赤一赤」，反應呢啲真係因人而異。

打完兩三個鐘後個人就開始攰，結果瞓咗兩個鐘。瞓醒又好番好多，係個針口有少少痹。不過小冊子話，副作用可能會打完兩日後先出現，都係飲多啲水，飲吓醋，盡量休息多啲，hope for the best la 💪

#疫苗 #Pfizer #BioNTech #復必泰 #NHS #英國生活 #香港人在英國 #英倫爸爸

___

Facebook: fb.com/englanddaddy

Instagram: Instagram.com/englanddaddy

MeWe: mewe.com/i/englanddaddy

Medium: englanddaddy.medium.com

Buy me a beer 🍺: buymeacoffee.com/englanddaddy