今年 1 月過嚟時，當時係未有消息 LOTR 會延長，而 BNO Visa 未開放申請，加上未租到屋，要帶住兩個小朋友喺嚴冬下住半個月 BNB，就算好想帶埋養咗 15 年嘅貓貓走，喺乜都未定嘅情況下，都係唔可能嘅事，就唯有將佢放喺老爸屋企暫養。
喺傾租約時，個盤本身冇寫 Welcome Pets / Pets allowed，雖然我隻貓未過嚟，但係都已經同 agent 講定會有一隻家貓，而合約入面亦已加入相關條款。原來喺今年 1 月尾開始，英國政府推出咗新指引，喺新嘅租約範本入面，寫明租客有責任確保寵物冇向業主或其他鄰居造成滋擾，而業主除非有充分理由，否則都唔可以無理拒絕唔畀寵物入住。
數據顯示，英國成年人家庭有超過一半有養寵物，但只得大約 7 % 嘅租盤係有列明歡迎寵物入住，令到唔少租客為咗要入住而被迫放棄寵物。所以，今次呢個新指引，對於喺香港本身有養開寵物嘅主人嚟講，絕對係一大喜訊。
第 1 步：打針
講番我隻貓，要帶佢來英國，就要先打晶片同埋 Rabies 狂犬針。上個月搵朋友帶貓貓去診所檢查同打針，之後仲要放喺模擬飛機壓力嘅高壓艙入面 15 分鐘，睇吓佢會唔會有異常反應，例如嘔或者流眼水等等，順利通過後，就證明貓嘅身體狀況適合上機。不過，打完 Rabies，都要隔 21 日先可以上機，而上機前 5 到 10 日仲要去作最後檢查。
第 2 步：搵機位
不過要上機都唔係咁易，因為疫情關係，聽群組網友講，德國漢莎同荷蘭 KLM 都暫停運寵物、芬蘭航空只運國民寵物、卡塔爾航空每個月得兩班，變相令到 BA 嘅寵物機位更加緊張，尤其每班機只係得幾個寵物機位。如果唔趕的話，唔少人都會先買寵物機票，知道邊日確認有位先再買主人嘅機票。BA 規定，主人 (或授權同行者) 要喺寵物機票日子嘅前後 5 日出發。
至於訂機位嘅方法，BA 係只能夠訂 1 個月後出發嘅機位，例如 5 月 4 日訂，就只能訂最早 6 月 4 日 嘅機位。另外，係要每日香港時間 0 時 0 分 send 電郵去 bapettravel@jasg.com ，係冇電話號碼可以畀你隨時訂嘅！不過，如果有問題查詢，照 send 去呢個電郵都可以，一兩日都會覆。
幸運地，呢兩日終於叫確認到今個月尾嘅機位，要多謝有位朋友咁啱果段時間過嚟做到同行者。希望我隻貓可以順利到埗啦！
參考資料：
New standard tenancy agreement to help renters with well behaved pets
#寵物移民 #貓貓移民 #寵物移民英國 #英國 #BNO #LOTR #英國租屋
___
Facebook: fb.com/englanddaddy
Instagram: Instagram.com/englanddaddy
MeWe: mewe.com/i/englanddaddy
Medium: englanddaddy.medium.com
Buy me a beer 🍺: buymeacoffee.com/englanddaddy
