喺香港，倒垃圾係一件好簡單嘅事，裝滿垃圾桶就掉出去垃圾房，因為每日都有人收垃圾。不過喺英國就唔同，以我住呢區嘅 Council 為例，每一戶人會分派 2 大 1 小嘅長型垃圾桶放屋外，黑色嘅係放「普通垃圾」 (General waste)，綠色藍蓋嘅放「可回收垃圾」，而細嘅啡色就放「廚餘」。(另外。我呢度可以向 Council 畀錢申請另一個大嘅垃圾桶放「花園垃圾」)
不過，每兩星期先倒一次「普通垃圾」；「廚餘」同埋「可回收垃圾」，就每個星期收一次。為咗唔好令到個垃圾桶咁快爆，就要放多啲「可回收垃圾」。有咁嘅時間安排，都係想住戶善用可回收垃圾桶，Council 宣傳話，其實有 60% 嘅家居垃圾都係屬於可回收，太太成日話我，嚟到變咗環保大使。
以上都係我住果區嘅分法同時間安排，唔同 Council 有唔同做法，好似有聽過中部有區域係得「普通垃圾」同「可回收垃圾」。如果唔要嘅係舊衣物或舊鞋，可以考慮吓捐出去社區嘅慈善團體，或者去附近大型超市睇吓，有時都會有專門回收衣物舊鞋嘅收集點。
新搬入嚟，少不免會有好多紙皮剩番，如果要掉，除咗整細放落可回收垃圾桶外，數量多嘅就要去回收中心喇 (Recycle centre)。位置可以 Google 打番你住嘅區或郡名，再加 recycle centre 去搜尋。
早排車住一車紙皮去過一次，果度地方好大，揸車都要排隊入。回收中心入面有分開唔同嘅區域，例如掉紙皮、掉鐵、掉舊單車、掉舊電器等等，輪到你架車入，就可以去泊車區泊低，之後將你要掉嘅嘢分門別類去番唔同嘅區域度掉喇。
_______
Facebook: fb.com/englanddaddy
MeWe: mewe.com/i/englanddaddy
Medium: englanddaddy.medium.com
Buy me a beer 🍺: buymeacoffee.com/englanddaddy
