今朝瞓醒，就發覺自己瞓少咗 1 個鐘，因為今年嘅夏令時間正式開始，噚晚個鐘由凌晨 0:59 自動變成 02:00。
因為本身係球迷嘅關係，喺香港時都要捱夜起身睇波，所以好自然都會留意到英國有夏令時間呢樣嘢：凌晨 3 點起身，同凌晨 4 點起身，感覺都差好遠㗎。
夏令時間，或者叫做日光節約時間 (Daylight saving time)，個原因聽聞係因為踏入夏天早天光，大家早起一個鐘，就可以享受多啲日光。除咗英國外，其實歐洲、北美洲、澳洲等超過 70 個國家同地區都有夏令時間。
夏令時間嘅開始，即係意味住同香港嘅時差就會少咗 1 個鐘，直到 10 月底。不過，歐洲早兩年已經開始討論緊會永久使用夏令或冬令時間，唔使一年改兩次鐘，曾經做過個調查，有 8 成受訪者都贊成永久使用一種時間。不過英國歐已脫，早兩日 Boris Johnson 被問到會唔會跟隨歐洲計劃取消夏令冬令時間時，佢就話未有打算。
而家大部分人都係用電話睇時間，夏令冬令時間都唔使手動調校，而兩個揀的話，同香港時差少 1 個鐘感覺點都好啲，我就贊成永久使用夏令時間喇。
#夏令時間 #SummerTime #BST #DST #日光節約時間
_______
Facebook: fb.com/englanddaddy
MeWe: mewe.com/i/englanddaddy
Medium: englanddaddy.medium.com
Buy me a beer 🍺: buymeacoffee.com/englanddaddy
