喺睇呢篇關於插班報學校之前，要先留意 #唔同Council有唔同做法 ，有一啲地區，報學校係直接同間學校去報，好似 Sutton 區同埋朋友去 Birmingham 咁，有機會喺過嚟英國前，就已經有學校收；但亦有一啲區係要向 Council 報，好似我住呢區咁，就算直接 Email 問學校有冇位，佢都係回覆要我直接向 Council 報，所以你首要係先去番你果區所屬嘅 Council 網站去睇清楚玩法係點。
喺前一篇講過用 Locrating 去幫手搵學校同搵屋，呢個時候，你應該已經有一啲心儀學校。就算你嘅小朋友係讀緊小學，都盡可能考慮埋中學，始終小學唔會相差太遠，但中學嘅數量會少好多，如果好似我大女咁，兩年內就會升中，就更加要諗埋中學，盡可能梗係唔好離開住屋太遠。
— — — — — — — — —
以下嘅經驗分享只係我果區嘅做法：
Step 1/ 我呢區要報插班，就要經個郡 (County) 嘅 Council 網站去做，所有申請都係網上進行，申請人係我自己，而我就係幫小朋友去報；除咗填小朋友嘅資料外，要有 2 張住址證明，其中一張就係租約或買賣合約之類，另外一張可以係 Council Tax 信、水電煤嘅帳單等；我當時係簽好咗租約，收到一封有我個名嘅能源公司嘅迎新信 (welcome letter)，就膽粗粗試報。
Step 2/ 另外，我亦都上載咗兩個小朋友嘅 Passport 加 LOTR visa 印做證明，同寫咗封簡短嘅信，講咗少少我哋以 LOTR 入境，6 個月內可以讀書同工作，附埋 GOV UK 入面嘅相關連結。另外，都講埋我哋已申請 BN(O) Visa，諗住喺度長期逗留，盡量畀多啲背景 Council 職員。
Step 3/ 然後，就可以填 4 間學校，如果係正常報讀就梗係要睇學校嘅收生政策 (admission policy)，但係插班都係睇學校本身有冇位，同相隔住址近唔近 (佢哋會用住址同學校嘅直線距離計算)。其他好似小朋友嘅能力證明，係完全唔需要，亦冇任何面試，而我哋就填咗住址附近嘅 4 間 Ofsted Outstanding 或 Good 嘅學校。要留意嘅係，小學都有分有啲只收到 Year 2 (二年級)，有啲學校只收 7–11 歲，但學校分拆兩間嘅一般都喺左近，所以我兩個小朋友報嘅學校都唔同。呢啲資料，去番 Locrating 都搵到。
— — — — — — — — — -
我報嘅 Council 係寫 10 至 15 個工作天就會有結果，喺呢段疫情期間，我都覺得只會有遲冇早，但係喺 5/6 個工作天後，就收到 Council 嘅回覆！
我相信喺啲熱門區，收生嘅情況一定爭得更犀利。我幫兩個女報，佢哋年紀相隔 5 年，大女 4 個志願全部冇位，而細女派入第 2 志願，但係 Council 嘅回覆就話，因為大女所揀嘅學校都冇位，佢哋就幫我聯絡咗一間距離我住址最近又有位嘅學校 (其實車程都要10分鐘)，而佢都好貼心咁話，呢間學校亦都有位畀我細女，如果想揀呢間就回覆番 Council，完全明白家長如果要去兩間學校接送兩個小朋友係有難度，值得一讚！
雖然呢間學校唔係我哋揀嘅 4 個志願入面，但我哋再睇番學校資料，都覺得呢間開校唔夠 10 年嘅學校都唔錯，而我哋都想兩個女可以一齊喺同一間學校讀，所以就回覆番OK，喺個零星期後，學校就打畀我，話搞掂晒手續，佢哋就正式開始新嘅學校生活喇。
P.S. 其實我報嘅 Council 都有個上訴機制，你可以再補交一啲原因/資料去為某間學校再申請一次，不過要留意，Council 話小學嘅 Reception 班去到 Year 1–2 係有每班人數嘅法定限制，滿嘅話真係收唔到。
P.S.2 專頁在英倫的日子版主講過，佢小朋友之前都係要分開兩間讀，但排幾個月隊就可以等位轉校，呢樣都可以考慮，不過如果讀得好好地，就再諗下係咪轉啦。
_______
Facebook: fb.com/englanddaddy
MeWe: mewe.com/i/englanddaddy
Medium: englanddaddy.medium.com
Buy me a beer 🍺: buymeacoffee.com/englanddaddy
