我諗決定嚟英國嘅朋友，有一半以上都係想小朋友可以逃離唔知會變成點嘅香港教育，所以幫小朋友搵學校好重要，亦可能會影響選區落腳同搵買盤租盤，我之前用過 Locrating 呢個網站，覺得幾有用，所以向大家推介一下 (利申先，純粹個人經驗分享，冇任何利益㗎)。
Locrating 係 2009 年由軟件設計師 Lewis Tandy 同太太創立，創立原因，係當時佢哋計劃搬屋，但又未有心水目的地，唯一肯定嘅，就係想近一啲好嘅 local school。不過，當時上網搵資料，除咗個個都會睇嘅 Ofsted rating (教育標準局評級) 外，好多其他資料都欠缺，所以就決心要起個平台幫吓自己幫吓人。
Locrating 雖然係一個睇資料嘅參考網站，但都有分免費版同收費版。免費版睇到基本學校資料，學校包括免費政府學校 (state school) 同收費私校 (independent school)；收費版要註冊同收 7.99 英鎊月費 (可以隨時cut，香港朋友應該會平啲)，就可以睇到進階版資料，好似收生距離、catchment area、以往嘅考試成績、家長們嘅評價數據等。
至於點開始用或想了解多啲佢嘅功能，可以睇呢篇：
https://www.locrating.com/Blog/quick-start-guide.aspx
Step 1/ 打地區搵學校
一般用法，都係假設大家已有心水落腳點，就直接打個地點去搜尋，佢就會出曬果個地點周邊有乜嘢學校，一目了然，你就可以按自己需要去篩選搜尋結果 (例如只揀中學或小學，唔顯示私校，用男校/女校/男女校去搵等等)，綠色代表 Ofsted 評級為 Outstanding 嘅；黃色就係代表評級為 Good；橙色係評級為 Requires Improvement；紅色就係 Inadequate；紫色就代表私校。
Step 2/ 詳細睇學校資料
雖然大家都可能會好自然想小朋友讀到 Outstanding 學校，但英國居民又何嘗唔係？所以，一般 Outstanding 學校都好搶手，oversubscribed 比率好高。其實，由香港嘅填鴨學校，嚟到英國可以有機會唔使錢讀到好似國際學校一樣嘅 state school，都應該唔好要求太多。
另外，都要睇吓係咪有 Ofsted Outstanding 牌頭就係好？某啲 Ofsted 嘅報告，已經係 2010 年嘅事，咁呢 10 年來間學校又係咪一路咁好呢？所以我建議大家都可以睇吓學校嘅其他資料，例如家長評價，考試成績，收生政策 (admission policy) 同撳入去學校本身嘅網站，睇吓係咪鍾意佢哋嘅理念目標、活動同課程內容。
Locrating 入面嘅學校資料，有收生人數、男女學生比例、第一語言係英語嘅學生比例、Free lunch 嘅人數比例同最新考試成績等；而家長評價，就有學生係咪讀得開心，有冇 bullying (欺凌) 嘅情況同是否推介其他家長去呢間學校等。
Step 3/ 連接 Zoopla Live data 即時搵盤
有心水學校s 後，用 Locrating 入面 Property search 搵買盤租盤我覺得好好用！上一篇講過，Rightmove 同 Zoopla 都算係英國搵盤最常用嘅網站/app，而 Locrating 係直接連上 Zoopla 嘅最新資料，除咗可以睇有冇盤喺心水學校附近同價錢係咪負擔到外，亦可能睇到某個租盤果區附近嘅學生係讀緊邊間學校，可以知道住呢度嘅入邊間學校機會較高。
個人意見，如果小朋友係讀小學，都要考慮埋中學，始終中學數目會少好多。至於點報名學校，就唔喺呢篇講啦，而且好取決於你住果區嘅 Council 係點做法 (公立學校)，有自行向學校問有冇位嘅，有位就收，所以有香港人未過嚟就報到學校；亦有直接問 Council 先報到，連直接問學校有冇位都唔答，叫你問番 Council。至於我幫小朋友報學校嘅經過，之後再同大家分享。
Locrating:
https://www.locrating.com/schoolsmap.aspx
#英國學校 #Locrating
_______________
Facebook: fb.com/englanddaddy
MeWe: mewe.com/i/englanddaddy
Medium: englanddaddy.medium.com
Buy me a beer 🍺: buymeacoffee.com/englanddaddy
