今日揸咗成百公里嚟到倫敦南部，去到簽證中心 UKVCAS 度完成申請BNO Visa嘅最後一步。
// 幾時book？//
因為喺1月31號開放申請後，我哋上網用咗半日填form同畀錢。畀曬錢後，先知到原來仲有最後一步，就係要拎 Biometric information，要去簽證中心 UKVCAS 度影相同打指模。(如果係香港就係去北角果度做)
中心要預約，其實全國都有唔少選擇，不過就真係好full，基本上申請日打後一個月都冇晒期。而且，仲要畀錢去做呢個booking，每一日有唔同時段揀，每30分鐘為一個時段，但要畀成 £110，又真係唔多合理。
於是，我就打去中心嘅電話服務號碼 0844 8920232，喺英國打電話搵客戶服務比起Email普遍……不過，呢個號碼係要收費嘅，我就用 Skype 電話App 買咗幾十蚊 credit 打去。順帶一提，用 Skype 當長途電話打番去香港都好平，講超過5分鐘都係收兩三蚊港紙。
講番 UKVCAS，個agent就話，每一日朝早 9 點都會更新一啲新嘅時段畀人報，而果時佢就特別講話倫敦南部 Croydon 間中心會有一啲 Free 嘅時段，於是第二朝一早就入去撳喇，一撳就撳咗一個月後嘅期。除咗呢間外，會唔會英國其他中心都會有免費時段揀，我就唔太清楚，有需要可以打去問吓。會唔會每朝都有啲唔要嘅 timeslot 放番出嚟，可以朝早入去試。
// 當日流程 //
由你預約時間後，佢會 send 個 email 畀你，入面有個 QR code 當日用，最好就印定出嚟。由你預約到你真正去中心搞，都應該有一段時間，你就喺呢個時間將申請 BNO Visa 嘅所有文件 upload 一次去 UKVCAS 個網站度。
今日準時去到，門口保安人員就會問你拎個 QR code 核對，之後入去要有 簡單檢查行裝嘅手續，入到去負責人員會問你拎護照同張 QR code，由於佢要拎住個 code 去 scan，所以最好就印出嚟，唔係要拎你個電話入去 scan 就冇咁好喇。
拎護照對完你資料後，就會先影相。影相我估計係用作做 BRP (Biometric residence permits) 之用？需要除口罩，頭髮唔遮耳仔唔遮眉毛，唔准戴眼鏡影。影完相，就會先打食指至尾指嘅指模，再打拇指，兩隻手打完，佢就會將你本護照逐版掃瞄，之前申請時填嘅旅遊記錄就可以對得番。
最後，佢就會問你係咪 OK 可以將所有申請資料交畀內政部 Home Office，雖然我拎番晒申請時嘅文件，但除咗本護照，負責人員最後一樣都冇問我拎出嚟睇。我哋一家四口，輪流做成個過程大約 40 分鐘左右。順帶一提，有小朋友嘅打指模果部分可能要試多幾次。
之後就係番屋企等消息喇，希望一切順利！
#BNOVisa #LOTR #UKVCAS #英國 #倫敦
_______________
Facebook: fb.com/englanddaddy
MeWe: mewe.com/i/englanddaddy
Medium: englanddaddy.medium.com
Buy me a beer 🍺: buymeacoffee.com/englanddaddy
