// 買車 //
今次會分享吓買二手車，買車保嘅少少經驗同流程。唔少人都介紹過，我都係喺 AutoTrader 呢個網站度睇車同買車，呢個網站就好似香港嘅 28car 咁，有私人買賣，亦有車行放車，因為英國咁大，所以首先就要輸入你住果區嘅 Post code，同設定番區域嘅幾多英里，再定埋你想揀嘅車嘅基本資料 (例如咩牌子、自動波定棍波、行咗幾多英里等)，就會顯示到結果。除咗AutoTrader外，都可以試吓去車廠嘅網站，果度都會有二手車，仲有Facebook嘅Marketplace都有唔少：
AutoTrader — 車款最多，網站易用，有好多周邊資料好似目標車嘅running cost同賣家/車行評分，私人賣家嘅車通常平啲，但車行嘅跟進服務會好啲。
車廠二手車 — 車廠嘅二手車應該係三個地方入面最貴，但一般都會跟一兩年保養，質素應該最有保證。
Facebook Marketplace — 有好多私人賣家放嘅車都好平，但賣家同車嘅質素就未必有保證
其實都有睇過啲歐洲車款，不過到最後都係揀番日本車，喺香港揸過Honda同Nissen，嚟到就揸埋Toyota。上過28car格過同年份嘅比較，我揀呢架混能車價錢比香港平五、六萬。如果係揀棍波車價錢仲平。
喺英國，車牌係一直跟住架車，只要去 Number Plate Check 呢個網站，就可以睇到架車幾時做年檢，有冇交到汽車稅，畀多幾鎊仲可以睇到詳細嘅報告。
因為lockdown關係，好多車行都唔開，職員都係WFH，但係都唔代表冇得試車。車行就約我去一個火車站，再搵人車我去佢屋企附近試車。
架車上個月先做完 MOT (即係類似香港嘅年度驗車，英國3年車齡以上嘅車就要每年做)，睇過 MOT 報告，再試完覺得 OK，就可以畀錢。已經開咗英國銀行戶口嘅就當然最方便，但我就係用 Transferwise 分兩三次咁過數。
// Transferwise 係一個方便易用嘅工具，可以將你香港嘅錢好快咁過去外國戶口，匯率會好過部分銀行，但佢就會收番手續費，所有轉錢數目同手續費都係一目了然。如果用我介紹嘅 link 申請，頭 HKD 5000 轉帳嘅錢都係免手續費！ //
可能因為係星期六嘅關係，平時10分鐘內就收到，今次要等成個鐘先收到。收到錢之後，車行就會畀將買賣收據畀你，上面有你個名，證明你係邊月邊日買咗呢架車，另外會將 Logbook (類似香港牌簿) 其中 New owner 果部分撕畀你，有呢張嘢，就可以證明你係新車主。之後，車行就會將資料向 DVLA (Driver and Vehicle Licensing Agency，即係英國運輸署) 更新，DVLA 就會將新 Logbook 寄畀你。
// 記住買保險先好揸！ //
買完架車，其實即日就可以揸走，不過英國揸車一定要買保險，通常都係教有兩個選擇，第一就係買臨時保險，臨時保險可以少到保1個鐘，但我實測過，搵過10間8間保險網站都係買唔到，拎住香港車牌嘅好多公司都唔做臨時保險；第二個方法，就係同車行傾，佢就搵人幫我揸去住嘅地方，順便送埋我番去。其實而家買車如果你唔試車，佢哋都鼓勵你揀 “Click-and-collect”，即係網上買，佢送到架車去你門口，如果你揀嘅車好新，其實都可以考慮呢個方法。
有人送咗架車番去，就可以上網格價買正式保險。因為未有英國正式車牌，亦未有得儲呢面嘅 NCB (No claim bonus)，所以第一份車保都會較貴。不過，當你換咗正式車牌，又有正式地址之後，打番電話去保險公司度，應該可以減番價。
車保比較網站，可以去 Compare the Market 或者 USwitch，再自己打電話去保險公司傾。呢度車保價錢係由好多唔同因素去決定，例如：你泊車嘅地點係咪高風險，日頭同夜晚泊邊，係街上面定係有車房，係咪新牌仔，有冇NCB等等，當然，你揀嘅車係屬於邊個 insurance group，group 由1到50，愈低嘅保費亦愈低，好似 Fiat 就係 3，Nissen Note 係6， 2020年新出SUV Renault Captur 都係9，而我買呢架豐田 Prius就係16。原本想過買電動車，但係所有全電動車 insurance group 都係50，我哋未有英國車牌未有NCB應該保費會好貴，所以就打消念頭。
下一步就係將香港車牌換做英國車牌。我有申請國際牌先過嚟，但拎住香港車牌都可以喺英國揸一年車。通常啲人都會教，住滿185日之後，就可以將香港牌換做英國牌，但都有人喺群組分享到埗就拎去換而係畀換嘅，所以我都會去郵局拎表格試吓換牌睇下係咪得。
#英國車牌 #英國買車 #Autotrader
____________________________
Facebook: fb.com/englanddaddy
MeWe: mewe.com/i/englanddaddy
Medium: englanddaddy.medium.com
Buy me a beer 🍺: buymeacoffee.com/englanddaddy
