大家好，就由呢篇開始講吓去到英國嘅嘢，呢篇可能會長少少。
雖然BNO Visa係由1月31開始接受申請，但因為到1月中，英國政府都未公布係咪會喺正式開放申請後，仲繼續提供畀香港人以LOTR方式入境 (唔係Lord of The Rings，係Leave Outside The Rules，一種英國政府開放畀非本國人短期入境嘅途徑)，所以考慮後都決定搏一搏提早過嚟先，以免夜長夢多。
//Check勻航空公司有著數//
我哋一家四口，本來梗係搵直航飛，但係CX、維珍同英航直航機都唔係日日有班次，我哋揀果晚就冇機。上CX網睇，有3班同其他航空公司聯營嘅班次，都係轉機，其中一班係漢莎航空，由香港飛法蘭克福再轉機去倫敦，票價係八千幾蚊，咁貴梗係唔考慮。不過，當我試下直接去漢莎個網站睇同一班時，竟然發現同一班機機票只係二千幾蚊，差唔多係喺國泰買嘅四分一價錢，考慮咗大半日就決定扑鎚。
到起飛果一朝早，收到Email先知原來漢莎香港去法蘭克福班機取消咗，將會轉搭CX去法蘭克福班機，結果就用平價錢搭到兩程唔同公司嘅機喇。
香港嘅機場而家係好少人，如果唔係畀人入去送機，場面會更加冷清。好處就係，喺飛機入面，大家可以有多啲位置伸長個人瞓好少少。我諗大部分去英國嘅家庭都會揀直航，所以當晚一齊目的地係英國嘅香港人其實唔多。轉機要再過關，所以如果真係要揀呢個方法，行動都要盡量敏捷啲，我因為部Switch冇喺個背囊度拎出嚟，都畀德國人check多咗10分鐘。
//BNO過關係咪可以排快隊？//
由香港去法蘭克福，大約12個鐘左右，兩個鐘後轉機去英國，機程就只需要1個鐘，香港凌晨1點機出發，最後去到英國差不多朝早9點，即係香港第二日嘅下晝5點喇！
落機後，就要等過關申請LOTR。入境時係有兩條隊嘅，左面果條叫 Other Passport，右面果條就畀國民同歐盟人士，係少人排好多。咁究竟拎住 BNO，又係咪可以行右邊快線呢？答案係，如果你純粹拿BNO平時入境，係的確可以行右邊，但如果你係要申請LOTR，就要去番左邊條長龍喇。
我哋去到counter，開頭係一個女子負責，但佢聽見我哋係想申請LOTR，見到佢少少面有難色，呢個時候，後面有個高大男關員挺身而出，同佢講「等我嚟」，就由佢去處理。因為我哋之前都做咗唔少功課，仲特別準備晒各種證明文件嘅影印本，但到最後，除咗問我哋拎財政證明外，其他嘢都冇特別問，等咗佢15分鐘左右拎啲護照去做記錄後，就喺我哋四本護照度吸上蓋印，講明可以入境6個月，呢6個月內可以搵工、搵屋租、搵學校，但唔可以拿取國民資助，同時提醒我哋，月尾就可以正式申請BNO Visa，就由呢一刻起，我哋就正式開始新生活啦。
P.S. 我哋一家四口，總共拎咗4大4小行李喼，再加幾個背囊，去到坐普通的士或Uber唔分車都可能有困難。除咗幫襯希斯路機場嘅細van服務外，都可以考慮一下 英國機場接送服務，雖然最後冇用到佢哋車，但都好熱心幫助，大家可以提前預約定。
下一篇，就會講吓入境英國後，究竟使唔使隔離，又點樣隔離法？
#英國 #LOTR #倫敦 #希斯路 #英倫爸爸
_______________________
Facebook: fb.com/englanddaddy
MeWe: mewe.com/i/englanddaddy
Buy me a beer 🍺 : buymeacoffee.com/englanddaddy
